प्रदेश १ मा थपियो चार राज्यमन्त्री
नागरिक सञ्चार
प्रदेश नम्बर १ का मुख्यमन्त्री शेरधन राईले मन्त्रिमण्डल विस्तार गरेका छन्। उनले आइतबार चार राज्यमन्त्री नियुक्त गरेका छन्।
रामबहादुर मगर, अम्बिरबाबु गुरूङ, जसमाया गजमेर र विजयकुमार विश्वासले राज्यमन्त्रीको सपथ लिएका छन्।
मगर भूमि व्यवस्था, कृषि तथा सहकारी, गुरूङ भौतिक पूर्वाधार विकास, गजमेर सामाजिक विकास र विश्वास उद्योग, पर्यटन, वन तथा वातावरण राज्यमन्त्री बनेका हुन्।
प्रदेश १ का निमित्त सचिव गोपीप्रसाद घिमिरेले अपराह्न एक विज्ञप्ति जारी गरी मुख्यमन्त्री राईले संविधानको धारा १६८ को उपधार (९) बमोजिम मन्त्री नियुक्त गरेको जनाएका छन्।
प्रदेश सरकारमा कृषि र भौतिक पूर्वाधार मन्त्री नियुक्त भएका छैनन्। यी दुबै मन्त्रालयको जिम्मेवारी मुख्यमन्त्री राईले नै सम्हालिरहेका छन्।
भौतिक पूर्वएमाले र कृषि पूर्वमाओवादीलाई दिने भागबण्डा थियो। पूर्वमाओवादीले मन्त्री चयन गर्न नसकेपछि कृषि खाली थियो। पूर्वएमालेमा आकांक्षी बढी भएपछि मुख्यमन्त्री राईले नै सो मन्त्रालय राखेका थिए।
पार्टी एकीकरण भएपछि पनि पूर्वमाओवादीले प्रदेश-१ सरकारमा ‘स्थान नपाएको’ गुनासो गर्दै आएका छन्। आइतबार नियुक्ति भएका मन्त्रीमा पनि विश्वासमात्र पूर्वमाओवादी हुन्।
अब प्रदेश १ को मन्त्रिपरिषद् ९ सदस्यीय मन्त्रिपरिषद भएको छ। मन्त्रिपरिषदमा पूर्वमाओवादीबाट आज नियुक्त भएका विश्वाससमेत दुई जना छन्। यसअघि आर्थिक मामिला मन्त्री इन्द्र आङ्बो पूर्वमाओवादीबाट मन्त्री भएका थिए। सेतोपाटीबाट साभार
ताजा खबर
